قصيدة اهناك ناس ...

اهناك ناس تكرههم من اول ليله...وهناك ناس مايهونوا اسنين طويله
اهناك ناس حبايب... وهناك ناس تكرههم بغير سبايب
ولا عقل عامر كيف عقل الخايب...ولا وجوه تندى كي وجوه بخيله
* * * * * * * * * *
اهناك ناس يامحلاهم...وهناك ناس حسديه وسود نياهم
وهناك ناس غوالي...حتى ان باعدو ماكيفهم لا والي
حمالين لسيه بطوعة بالي...علي خطهم ماعندهم تحويله
وهناك ناس عشرتهم خطا طوالي...مكتوب في جباهيهم خراب العيله
وهناك ناس تعزم والجيوب خوالي...وهناك ناس تبخل والجيوب ثقيله
هدايات من الرب الكريم العالي...وبو طبع ما تنفع امعاه الحيله
* * * * * * * * * *
وهناك ناس ماتقبلهم...وهناك ناس لك غايه اتجول الهلهم
وهناك ناس ان دارو الخطا تحملهم...وهناك ناس في عقلك الهم تجفيله
وهناك ناس عالحيين لا تجملهم...اللي تجيك منهم ما لها تبديله
ولا يفرقو ضني الا بعملهم...ماحد عالتسعه امزود ليله
وهناك ناس ماينسو اللي صارلهم...يردوه بعباره واافيين الكيله
وهناك ناس لاهب الهبوب خبلهم...ونسيوا اللي عدا وضاع جميله
ولا خير ف اللي مايبات عللهم...ولا ف الخليل ان كان فات خليله
* * * * * * * * * *
اهناك ناس يامبهاهم...وهناك ناس توعدهم وما تلقاهم
وان قابلتهم تلقى العذر امعاهم...مجهزينه ماعندهم تعطيله
كلامهم اللي قالوه ضد انياهم...ان كان بحرو ينوو على التقبيله
لصحاب كيف في وصف العدو تلقاهم...صحبتهم امعاك امغير نصب وحيله
قريب نقصهم منك بعيد وفاهم...مشيول عالدبر في حملهم تمييله
مفتوح عالخصاره بيعهم مشراهم...الستره مع بوصاحبين قليله
* * * * * * * * * *
اهناك ناس أماره...وهناك ناس ماضني ايساوو باره
وهناك ناس تلقى سعيهم في الكاره...وأرزاق واجده غير النفوس بخيله
والمال في قليل العزم راه اخساره...حتى وهو حكيم بعلم في تعديله
وهناك الفقير وما يساوي عاره...حتى انكان ماعنده اليد طويله
وان ما كان في جيبه قضي من جاره...علي قيس نيته ربنا بعطيله
موكار الصقور ماتجيه احباره...ولا مرومه تلحق ثمن لاصيله
وحظك اللي ترميه م البذاره...يطلع ابعينه تحصده وتشيله
وشرف الجمل حتى ان خف اعياره...صليبه علي حمله اخرى ترميله
شديد العصب حمال في مشواره...قطاع الفيافي وين مد رحيله
ان راد ربنا ماحد يسيب كاره...الراس راس والواطي ان زال وذيله
* * * * * * * * * *
هناك ناس يامبسلهم...لاغريب يقبلهم ولا من هلهم
وهناك ناس في الحيين شين عملهم...علقم وحنظل وين ماتاكلهم ...وان رافقتهم يبقوا عليك عديله
وان نازلتهم بالدار جار الهلهم...علي عيب عيل يجردو بالعيله
علي جارهم ديما يزيد عللهم...قلال العنا لاجت الدلو ثقيله


اهناك ناس تكرههك من اول ليله...وهناك ناس مايهونوا اسنين طويله
وشكراً
ناصر امطير
Nasser_king@Facebook.com